ابو الحسن انا اخت جميل قائد\بثينة

السلام عليكم ورحمة الله وبركاته

اتمنى شيخ ابو الحسن تفسر لي احلامي لاني والله العظيم متأثرة كثير منها ونفسي اعرف معناها لان نفسيتي سئية بسببها وربي....عموما ابو الحسن هي احلام لها فترة منها البعيد ومنها القريب بس المشكلة انها لازالت راسخة ببالي ولا قادرة انساه وكل شوي افكرفيها واتذكرها واحس نفس الاحساس اللي حسيته وقت ماحلمتها...لاجل الله فسرها لي وريحني لاني مالقيت احد يفسرها لي ولاوثقت اصلا بأحد....
-------------------------------------------
الحلم الاول\\\

حلمت اني بمدرسة لكن مبناها مثل البيت...دخلت اتلفت وانا احس بخوف داخلي وكأنه في شئ بالمكان هذا بس ايش هو ما كنت اعرف..شوي واسمع المديرة تقول للمعلمات بسرعة خرجوهم قبل ما يقفلوا علينا الكهرباء...وهم في خوف ورعب...وكان الوقت قريب المغرب يعني مسائي....وانا اتسأل بنفسي من هم اللي يقفلوا الكهرباء وليش هم خائفين\\\المدرسة مدرسة اطفال\\\المهم مافي ثواني الا وينطفي النور ويعم ظلام دامس جدا...ولقيت نفسي لوحدي في المدرسة ما ادري كيف اختفوا كلهم...وحسيت بخوف كبير وحسيت ان في احد بالمكان بس مو باين...وساعتها تذكرت كلام المديرة وقلت اكيد المكان مسكون بالجن...وفعلا طلع مسكون وهم كانوا يحاولوا يدخلوا بس مو قادرين لاني موجودة وصرت انا اقرء القران وخائفة جدا واحاول القى مخرج لكن مالقيت ...والتفت خلفي الا واشوف ولد صغير خائف واقف لوحده وباين الخوف عليه وحسيت انه يناديني اروح له واحضنه لانه خائف...وفعلا جريت عليه وانا مرعوبة عليه وحضنته من قلبي وصرت اكمل قراءة وبيني وبين نفسي اقول لازم اخرج الولد من هنا لايؤذوه...لكن للاسف مالقيت مخرج ولما تعبت من الخوف والقراءة صرخت بصوت عالي وقلت\\يااااااااااااااارب\\\الا واشوف واحد واقف قدامي وباين عليه الزعل والضيق...وكان هذا واحد منهم ظهر عشان يخرجني من المكان وكأنه يقولي خلاص طفشتينا لازم تطلعي من هنا...لانهم مو قادرين يدخلوا وانا موجودة....بس انا بالي كلهكان مع الولد هذا وميتة خوف عليه....المهم الرجل اشر لي على جهة باب وفيه خرم صغير يبان منه النور....ورحت اجري وانا حاضنة الولد عشان اخرجه وفتحت الباب والنور دخل بس مادخل لجوا لا بس كان برا لكن كان ساطع وحلو...ومديت بيدي بالولد لبرا عشان اطلعه وانا بنفس الوقت التفت لورى اخاف يغدر بي الجني.....وصحيت من النوم وانا مادة يدي بالولد لبرا الباب...وما ادري هل انا طلعت معه والا لا الله اعلم؟؟
-----------------------------------------------------------
الحلم الثاني\\\

حلمت اني كنت مع اهلي بالسيارة مع الوالد الله يرحمه وصار علينا حادث وتعور ابويا وكان اخواني يحاولوا يخرجوه من السيارة الا ونشوف سيارة ثانية لونها احمر عملت حادث برضوا وفيها شاب عمرهحوالي خمسة وعشرين....المهم اخواني اخذوا ابويل للمستشفى ورجعوا البيت وقالوا ان الدكتور يقول انه طيب بينام اليوم بالعناية المركزة وبكرة يطلع...وواحد من اخواني اعطاني جواله ومفتاح وقالي ترى الشاب اللي عمل الحادث موجود عندنا ببيت الضيافة وانه يمكن يتصل على جواله ...وطلب مني اخويا اني اخذ جواله وارد على الشاب اذا اتصل...فقلت له طيب...وفعلا شوية ويتصل الشاب...قمت انا طلعت من الغرفة عشان اسمعه كويس لكني تفجاءت فيه يقولي بثينة سامحيني..
واتضح اني اعرف هذا الشاب واني كنت زعلانه منه كثير...بس كيف هو عرف بيتي وكيف عرف اني انا اللي حرد على الجوال ما ادري...وقلت له انا طيب والمطلوب مني؟؟قال سامحيني والله غصب عني وكان يبكي
وقالي ما ابغى الا شئ واحد...قلت له خير...قال ابغاكي تجي تشوفيني بس....قمت قفلت الجوال ورحت بيت الضيافة عشان اشوفه وكان مظلم المكان...ولقيت بنت اختي نايمة على السرير مو الشاب فاستغربت وقلت فين راح؟؟وهذه ايش جابها هنا؟؟؟الا قامت بنت اختي تحضني وتقولي شوفيه جوا...وكأنها تدري عن اللي بيني وبينه...ودخلت ادور عليه...الا وصحيت من النوم...
---------------------------------------------
الله يرضى عليك شيخ ابو الحسن فسرها لي...ادري والله انها طويلة بس احسها مهمة ولها معنى....ترى حلمت غيرها كثير وكل احلامي كذا طويلة وواضحة لدرجة تخليني اتمنى افسرها وربي...
اسفة لازعاجك والله....تحياتي وخالص دعواتي بالمغفرة والجنة بغير حساب......اللهم آآآآآآآآآآآآآآمين

البسوس