حكايتي مع الجن والسحر

بسم الله الرحمن الرحيم

قصتي مع السحر

حابة اني اشاركم قصتي يمكن حد يستفيد منها ويمكن حد يفيدني كمان بشي انا غفلانة عنه

من لما كنت صغيرة كانت تصير معي اشياءات كنت اعتقد انها شي عادي بس لما عرفت انه عندي سحر وعرفت شو اعراضه تلقائياً عقلي رجع يتزكر اشياء كتيرة كانت تصير معي وانا صغيرة وكنت ناسياها
كنت مرات كتيرة احسن انه في حد جمبي مرات كنت احس إنه في حد بيراقب في او يلحقني ومرات كنت اخاف هيك بدون سبب ، كنت اشوف منامات مخيفة وخاصة الاشباح السود وكان يصير معي هاد الي اسمه كابوس (ابو رابوس) بس ما كنت اعرف شو هو
ومع الايام تطور الوضع وصرت اشوف خيالات أول ما غمض عيوني وبعديها صرت اشوفهم وانا صاحية واعية بس برضه كنت اعتقد انه شي عادي او انه مجرد خيال لشي معين تحرك وكنت اشوف شيوخ بالمنام بيقرأوا قرآن برضه كنت اعتقد انه مجرد حلم ليس إلا

في في 2011 الحمد لله ، الله من علي وطلعت عمرة ، وتقدير الرحمن الرحيم قدرلي اني امشي مع بنت من المجموعة الي طلعت معنا وكانت هاد البنت جريئة كتير قالتلي تعالي بدي اطلب قهوة سعودية من الستات السعوديات الي بساحة الحرم ، استحيت وحاولت امنعها بس هي اصرت ورحنا وطلب قهوة وكان من ضمن النسوان السعوديات ست اصلها يمني وساكنة بجدة كان وجهي مليان حبوب ضلت تتطلع في بصراحة استحيت وخفت منها
فسألتني ليه ما أروح ع دكتور جلد لحتى اتعالج
فخبرتها انه الي سنين بتعالج عند دكاترة جلد وانه استخدمت اقوى انواع العلاجات بس ما فاد معي خبرتها انها يمكن حالة نفسية
ردت علي وقالتلي لأ هاد مو حالة نفسية ولا مرض هاد حسد شديد ونصحتني اني اغسل وجهي بماء زمزم وعشبة السدر
خبرتها انه ما بعرف هاد العشبة وعدتني انها تجيبلي ايااها
ومر اسبوع وفعلا الست بعتتلي عشبة السدر بس هي ما اجت ولا شفتها
وتاني يوم قررت اعمل عمرة تانية بس بالليل صار معي شي يمكن غريب من اول ما حطيت راسي ع المخدة عشان انام صرت اسمع اية وما رميت اذ رميت ولكن الله رمى وضلت تتردد في ذهني طول اليوم
وتاني يوم المغرب رحت مع اهلي ع التنعيم احرمت والحمد لله اعتمرت تاني بس الاية هاد ضلت تتردد في ذهني طول النهار وطول وقت العمرة
وانتهت شعائر العمرة ورجعت على فلسطين لانه كنت حابة وجهي ينصلح حاله ويصفى ويروح الحب منه قررت اضل اشرب ماء زمزم واكل تمر وبعد شي شهر حسيت بمرار وحرارة كبيرة بصدري ومعدتي واستمر هاد الشي معي شي 3 أيام بعديها اجبرت نفسي اني استفرغ لانه حسيت انه في لازم يطلع من معدتي يمكن اكلت شي وما ناسب معدتي وخاصة اني انا أصلا معدتي ما بتتقبل اي شي في اشياء معينة لازم ابعد عنها مع اني كنت متأكدة بيني وبين نفسي انه ما اكلت شي غير التمر قلت يمكن هاد الشي لانه التمر حلو كتير وانا كترت منه ، بس لما استفرغت طلع من بطني اشياء غريبة (مادة مخاطية خضرة وفيها اشياء اسود، بالضبط شبيهة بالملوخية ) عرفت انه سحر لأنه صار هيك مع زوج عمتي وخاصة انه انا ما باكل الملوخية لانه بتعملي حساسية .
اصريت على ابي انه ياخدني على شيخ بس ابي ما كان مقتنع فصرت انا لحالي اقرأ قران على مية واشرب منها وأرش بالبيت فصارت احس بأشياء غريبة غير الي كنت احس فيها وصار الكابوس كتير يدايقني كان يجي مرة بالاسبوع بعديها صار يجي مرة كل ليلة وبعديها صار يجي حوالي اربع مرات او اكتر بالليلة ومرات بالنهار ازا بسهى او بنام وصار هاد الشي يدايقني صرت اقاوم ومرات استسلم وبعديها صرت احس بانه في حد بيلمسني وانا نايمة او نايم جمبي وصرت احس انه انا متزوجة واشوف خيالات ومنامات مش منيحة
بشكل او بأخر اقنعت اهلي انه ياخدوني على شيخ ، ورحت ع شيخ قرأ علي شوي وقالي انه عندي سحر تعطيل الزواج ومس وحسد لتعطيل العمل واعطاني كتيب صغير وقلي طبقي المكتوب في لمدة اسبوع بعديها صعقني بالكهربا بظهري ، روحت من عنده وانا مش مقتنعة بالي صار بنفس الليلة حسيت انه حد مسكني من ايدي وصار يصرخ علي ومسك اصبعي بمشبك متل تبعون المستشفى الي بيقيسوا النبض فيها وصعقني بالكهربا خفت ، ومن تاني يوم بديت اطبق المكتوب بالكتيب وبعد اسبوع رحت ع الشيخ وخبرته الي صار معي صار الشيخ يضحك وقلي عادي هدول بينتقموا وقرأ علي وبرضه ما اقتنعت بالي صار ، ومن بعدها صرت احس حالي اني بدي ارمي حالي من السيارة لما تكون ماشية وفي مرة كنت بدي ارمي حالي من شباك الغربة بالطابق التاني ولما صرت أقرأ القران احس اني بدي ارمي وادعس عليه ،رجعت اشوف في المنام شيوخ بيقرأوا علي قرآن أو اسمع صوت دعاء " اللهم رب الناس مذهب البأس اشفها انت الشفي لا شفاء الا شفائك" وسورة الكافرون وسورة النصر ومرات لما يجي الكابوس لما اجي اقاوم وما اقدر لانه لساني بيكون مربط اسمع صوت داخلي يصير يصرخ الله اكبر فينفك الكابوس بسرعة والحمد لله
بعديها نسيت الموضوع وبطل يهمني بتقدروا تقولوا يئست وسلمت بالأمر الواقع الي انا نحطيت في وبطل يهمني قصرت اشوف منام انه في ست بتقلي في بمنطقتكم بالمكان كذا في امرأة بتفك السحر وتكرر هاد المنام اكتر من مرة فقررت اني أسأل وحدة من الجارات عن هاد الشي فخبرتني انه اه في هاد المرة موجودة بس هاد المرأة ما بتتعامل بالقران بتتعامل مع الجن فما رضيت اروح عليها ودلتني الست الي سألتها دلتني على شيخ واخدت معاه ميعاد وخبرت أهلي وقتلهم انه اخدت ميعاد مع شيخ وبدي اروح عنده وابي اخدني عليه والحمد لله بديت احسن انه في نتيجة على الاقلية صار عندي امل وارتحت نفسيا وبطلت اشوف المنامات المخيفة وبطلت احس بشي خاصة انه التزمت مع الشيخ والتزمت بالبيت بقراءة سورة البقرة كل ليلة بقرأها بالبداية كانت صعبة وما اتحملها اصير اعصب او انام او احس انها كتيييييييير طويلة وما رح تخلص ووووو بس هلأ الحمد لله بقرأها بشي ساعة او اقل مرات ومرة سمعت شيخ ع اليوتيوب بيحكي كيف تعذيب الجن وطرده من الجسد قلت اسمعها مش خسرانة شي والحمد لله الشيخ قال عن سور العذاب " الرعد ، الجن ، الواقعة ، الصافات ، القارعة ، الطارق، يس ...." وصرت اقرأهم والله ما عدت احس بأي شي ولا اخاف من اي شي وكل شي تغير للأفضل ، أنا قلت خلص الحمد لله خلصت وما عاد في شي وخاصة إني شفت اكتر من منام انه في بجسمي عقارب ويهربوا بتكاسلت وبطلت ملتزمة بقرأة السور بس بقرأ سورة البقرة بعد مدة بسيطة رجعت احسن انه في حد بيحاول يتقرب مني بس موقادر بس انا فهمت وعرفت انه لسة موجود وما راح هو لساته قريب مني بس مش قادر يوصلي ومرة على مرة تمكن مني وما عرفت شو السبب ورجعت أقرأ سور العذاب والحمد لله ما عدت حسيت فيهم وبنفس الليلة شفت منام ("كانت في بنت عمي واسمها صابرين ومعاها كتب اعتقد كانوا 3 أو 4 كتب وهي بتعرف اني بحب القراءة وقلتلها انوا كتاب بتنصحيني اقرأ قالتلي خدي هاد الكتاب كان اسمه صابرون قالتلي هاد الكتاب كان الرسول يحبه وكان نفسه يشوفه فأنا بقلها بالمنام بتعرفي انا قرأت سور من القرآن عشان الله يبعد عني الجن وشرهم بس مو عارفة اي سورة الي بتجاوب معي اكتر بتعتقدي انها الصافات او الرعد لهي بتقلي لأ سورة يس ") وبعديها بس التزمت بسورة البقرة ويس والملك ، وبعد بمدة شفت منام ("انه في شيوخ بيقرأوا قران على السماعات بالسيارة وبيلفوا بالسيارة في كل المنطقة "الحارة" وفجأ انا فتت على الحمام (مرحاض) اجلكم الله لهم الشيوخ بيوقفوا على شباك الحمام وكمان مشقوق شوي استحيت وغيطيت حالي بسرعة والحمد لله ما حد شافني نادى علي شيخ وطلعت على كرسي وقلي هاتي ايدك لمس ايدي وقال للجن الي جواتي اطلعوا وطلعوا وكان معاه بنته وصار ينادي وراح وضلت البنت وصار ينادي عليها ويحكي معاها بلهجة بدوية وأنا كنت بنادي عليه وبقله تعال لسة ما طلعوا كلهم لسة ضايل 2 بس راحوا ") وضليت ملتزمة على السور وع سماع الرقية الشرعية وخاصة الصاعقة 8 وبعد فترة سبحان الله صار المسجد بين فترة وتانية يشغل قران على السماعات وفي ليلة ولما اجيت انام حسيت فجأة اني غيبت عن الدنيا وطلع من راسي وكتافي حد كتير متل ما شفت بالمنام بالضبط وعرفت انهم طلعوا بس بيني وبين نفسي بقول لسة ضايل 2 وللاسف اانا استهنت بهدول 2 وما عدت ملتزمة متل الاول بالقرآن وهاد الحكي من شي 15 يوم فقط خلال هدول الايام رجعت احس انه في حد بيضل يتطلع علي مع انه انا بكون قاعدة لحالي ومرات بحس بحركة حوالي وشفت منام (" انه انا نايمة في بغرفتي وانه في عجل اسود وله قرون كبيرة بده يدخل الغرفة وانا صحيت وصرت ادفع بالباب لحتي ما يدخل") وبعديها بمدة شفت منام تاني("انه في بسة سودة كتير وانا بضرب فيها وعجبت فيها وانا بيني وبين نفسي كنت اعرف انها جن وكنت اقرأ اية الكرسي بس ما كانت تهرب وفجأة كنت بغرفتي واختي فتحت الباب ودخلت البسة وانا صرت اقرأ اية الكرسي بس هي ما بتهرب وانا بيني وبين نفسي بقول هاد الجنية اكيد مسلمة عشان هيك ما بتتأثر عضتني بإيدي بس ما وجعتني الحمد لله وانا سلمت عليها وبقلها خلص حلي عني لا اذيكي ولا تإذيني بس هي ضلت مصرة ورجعت عضتني مرة تانية بنفس المكان وما وجعتني بس بطلت اشوف وبقلها انا بطلت اشوف وصرت افتح عيوني وشفت وراها كمان بسة لونها احمر وابيض (برتقالي وابيض) ورجعت بطلت اشوف بقلها انا بطلت اشوف ابتسمت وراحت بعديها كان في واحد مخيف بيضل يلحق في وكان لابس دشداش متل اهل الخليج وانا كنت دايما اهرب منه بس بالاخر غير شكله ومسكني وقلي انا البقرة الي كنتي تهربي منها وكانت ريحة تمة كتير مقرفة وصار يعزف موسيقى وانا عزفته معه شوي وفجأ ضهرت بالمنام بنت تانية كانوا بيحاولوا يصوروها قال وهي بوضع مو منيح بس انا طلبت منها ما تنام بغرفتها وانها تنام بغرفتي") وحست انه هاد السحر او المس او الله اعلم شو هو مو انا المقصودة في المقصود في بنت تانية بس اجا في ولما صحيت من النوم كانت قبل اذان الفجر بشي نص ساعة تفلت على الجهة اليسار متل ما قال الرسول (صلى الله عليه وسلم) واستعذت بالله من الي شفته وامل من الله انه ما يتحقق الي شفته ، وقمت توضيت وصليت لله كم ركعة وقرأت سورة يس مرتين وسورة الجن وسورة النجم واية الكرسي وسورة الملك وصليت الفجر ورجعت نمت
بس الغريب في الموضوع انه الحلم ضل مستمر لحد ما صحيت الصبح ورحت على الدوام بس صدقا كانت اكتر ليلة مرعبة بحياتي

وهلأ انا رجعت التزمت مرة تانية بسورة البقرة ويس وان شاء الله اضل ملتزمة عليهم وما بعرف شو ممكن يصير معي
بس الشي الوحيد الي متأكدة منه انه الله رح ينصرني ويوفقني

ربي يحفظك ويشفيك يارب

بس الشي الوحيد الي متأكدة منه انه الله رح ينصرني ويوفقني

من توكل ع الله فهو حسبه ..

جزاكِ الله خير ع ذكر تجربتك ليستفيد منها الغير ..

أسال الله لكِ الشفاء العاجل ولجميع مرضى المسلمين ..

وأوصيكِ عزيزتي بالمحافظة ع أذكار الصباح والمساء وشرب ماء زمزم بنية الشفاء وعيشي حياتكِ بشكل طبيعي ولاتجعلي الامر يؤثر عليكِ ويعرقل حياتكِ .. وأنصحك أيضا بإستخدام العطورات الطبيعية ورشها في غرفة النوم .. فالشياطين تكرهها جدا ..

حفظكِ المولى ~

زهرة الكرز

ونور الشمس

الله يسعدكم ويحفظكم انتوا كمان
نور الشمس شكرا الك ع النصائح واصدقك القول الاذكار بالمساء ملتزمة فيها اما اذكار الصباح لأ
بس ان شاء الله التزم فيها